شهريار.......عايش في الدور


بتحبني؟!!..طب ما أنا عشقاك.إيه؟!!!...وحشاك!!!؟….بصراحة مش مصدقاك.

اهدى بس وبلاش تزعل،اصل أنا عارفاك،دايما زعلك زي الأطفال ومش بعرف أوصل لرضاك…أصلك لو جيت بصيت للدنيا ف بعدك هاتلاقي حياتي هلاك…ايوة طبعا محتجاك،لكن دايما مش لاقياك،حساك بعيد عني وقريب،بجد حقيقي مش فهماك.أصلك بقيت لغز،سر الأسرار في الكون،القلب القاسي الحنون…ساعات بكون الملكة في حياتك،وكتير في هواك بتكون مجنون.حياتك صحيح ملكي،مفاتيحها كلها في ايدايا،لكن أبواب قلبك مفتوحة لأي حبيبة تقول بهواك.

عايش ملاك..تخرج من غنوة لحدوتة،وحكاية طويلة وملتوتة،ولا بتّحرم ولا بتخاف،لكن بتلف تلف وترجع تاني لحضن هواك.

ما أنت حياة…نبض يدق على الأحاسيس..وأنا عايشاك،دايما سمعاك..وان مرة طالت غيبتك عني بكون شايفاك..بكون لمساك…دايما فكراك.

أما أنت يا شهريار عصرك وزمانك..مالك مغرور،حساك عايش على عرش الحب،من حب لحب..عايش في الدور،وتقولي دموعي بتجري في بُعدك..بتقول مكسور...عارف من غيرك أنا دلوقتي بعيش ازاي؟!!...زي العصفور...بجناح مكسور،مستني تطق شرارة نور..عايش في الضلمة وبالأحزان دايما مغرور....شفت يا أمور،لو يوم حسيت الحب بجد ما كنتش سبت قلبي يضيع،سافر لبعيد...غرقان ووحيد.لكن أنت عايش الحدوتة،مستني الليلة دي تخلص ياللا،وبسرعة تنادي على مسرور...

لا اصحى وفوق،دلوقتي هاقولك..ها فضل احبك،لكن يوم ما هاتيجي تبيع،هاتحس ازاي بتطير أرقاب بسيف مسرور...وهاتيجي بسرعة تدق الباب...هاتلف تدور..وتقول وحشاك...وساعتها أنا هارجع تاني عشقاك،حساك،لمساك...دايما فكراك...اصل أنا عارفاك....

تعريب وتطوير حسن